Artigos coa etiqueta: Busto

Tempo de Magosto Scout!

Publicado o 17/11/2014 por Grupo Scout Chan

O pasado dia 15 de novembro celebramos nas instalacións do local que temos en Busto o tradicional xantar de Magosto do Grupo Scout Chan. Ano tras ano o Comité de Pais e Nais do Grupo ven organizando este evento no que nos reunimos toda a gran familia do Grupo así como amigas e amigos e antigos membros do Grupo.

Aproveitamos a ocasión para desfrutar dun xantar comunitario e bastante campestre (se o tempo o permite) no que por suposto as castañas teñen unha presencia fundamental.

Á tarde tivo lugar a Asamblea de Nais e Pais da nova ronda solar 2014-2015. Nela, os scouters (educadores voluntarios e voluntarias) presentaron ás familias o plan anual deste ano, que recolle os principais retos aos que o Grupo quere facer frente, así como os proxectos que se plantexan os propios rapaces e rapazas de todas as seccións educativas.

Tamén se procedeu, como de costume, a renovar parcialmente o Comité de Pais e Nais. Un órgano de participación que resulta moi importante na vida do Grupo, sobre todo á hora de organizar eventos como o propio Magosto.

E así nos citamos coas castañas para o ano que vén!

Categorías: Grupo | Etiquetas: asamblea,Busto,comité de pais,magosto | Deixar un comentario

Lembramos o Certame Literario 2012

Publicado o 24/09/2012 por Grupo Scout Chan

Un intre da lectura dos textos participantes

O pasado sábado 16 de xuño, no marco da tradicional Sardiñada do Grupo, celebramos en Busto a entrega de premios dos dous concursos que se levaron a cabo esta Rolda dende a Biblioteca Chan 292.

En primeiro lugar, entregamos o premio á Manada por ser os gañadores do I Concurso “Lendo entre liñas”. Un premio ben merecido, xa que deron con máis da metade dos textos que había polo local.

Os premiados xunto coa Responsable da Biblioteca

Por outra banda, entregáronse os premios aos gañadores do II Concurso de Contos. Foron moitos os participantes deste ano, que llo puxeron difícil ao xurado á hora de ter que elixir os gañadores. Na primeira categoría, na que participaban os lobatos, a gañadora foi Lúa Valiño por “La magia de viajar”. Na terceira categoría (escultas), Laura Montoya por “India no corazón” e na cuarta categoría (scouters), Fran Gutiérrez por “Desoutra beira”. Ademais, entregouse un premio especial por “Un día na Selva” a Martín Viturro, que nos sorprendeu cun incrible conto que el mesmo converteu en libro e que, ademais de contar unha historia que nos fixo rir a todos, das súas páxinas xorden verdadeiras escenas en 3D feitas a man. Por suposto, despois de recibir o seu premio, os gañadores fixeron a lectura dos seus contos gañadores. Se queredes coñecer estas e todas as demais historias, podedes achegarvos a biblioteca, onde se atopa o libro que recolle todos os contos dos participantes. Libro que tamén lle foi entregado aos participantes e ao xurado, en agradecemento ao seu traballo, na entrega de premios.

¡Grazas a todos polas vosas historias!

Categorías: Grupo | Etiquetas: Busto,certame literario,escultas,lectura,lobatos,rovers,scouters,tropeiros | 1 Comentario

Moita actividade: andaina, inauguración, acampada, e… Sardiñada!!

Publicado o 16/06/2012 por Grupo Scout Chan

Hoxe sábado será un día de moita actividade no Grupo Scout Chan 292

A Manada, a Tropa e a Unidade Esculta comezarán as súas correspondentes actividades a partir das 10:30, no local que temos en San Pedro de Busto.

Será un día moi especial para os tropeiros posto que despois de moitas xornadas de traballo, limpando, lixando, pintando… á fin van a inagurar a súa parte do local de Busto, o cal redecoraron completamente. Para celebralo, a Tropa quedarase de acampada durante a fin de semana.

¿E o Clan?

O Clan, pola súa banda, tamén vai reunirse en Busto co resto do Grupo, pero o vai facer dun xeito moi rover: van ir camiñando seguindo a antiga vía do tren, dende o norte de Santiago ata Busto, pasando por Sionlla e Verdía. É un tramo que foi desmantelado fai un tempo e que sería interesante recuperar como vía de sendeirismo, ou Via Verde o cal están intentando potenciar algunhas plataformas sociais e veciñais de Santiago.

Pero iso non é todo… o motivo de que todos os rapaces do Grupo se xunten en Busto é a celebración de dous grandes eventos:

Por unha banda, ás 13:00 celebrarase un Certame Literario, no que participan os rapaces de todo o Grupo e ó cal poden tamén asistir nais, pais, amigos e antigos membros do Grupo…

… e que ninguén se mova, porque a partir das 14:00 comeza un dos eventos máis tradicionais do noso Grupo, a Sardiñada, organizada polo Comité de Nais e Pais do Grupo. ¡Haberá sardiñas e churrasco para todos!

En definitiva, un día de moita actividade no Grupo Chan, ¡pasémolo en grande mentres construímos un mundo mellor!

Categorías: Clan, Grupo, Manada, Tropa Scout, Unidade Esculta | Etiquetas: acampada,Busto,clan,comité de pais,manada,nais,pais,ruta,sardiñada,tropa,unidade esculta,vía verde | 1 Comentario

Reformas no local de Busto

Publicado o 28/03/2012 por Grupo Scout Chan

Presentamos un exemplo máis de cómo o scout non coñece mellor forma de acadar as súas metas que facer as cousas por si mesmo, con traballo e ilusión:

A Manada no seu remozado "cubil"

“O pasado sábado (24 marzo) tocou traballar a fondo. Tanto a Manada coma a Tropa comezamos sendos traballos de reforma nos nosos respectivos locais de Busto.

A Manada pintamos e redecoramos por completo o noso Cubil, ademais de dotalo de novos mobles.

A Tropa comezamos a realizar a nosa Aventura, que durará probablemente ata preto do campamento de verán. Este sábado tocou rascar parte da parede e lixar as sillas e máis a porta, para poder empezar a pintar á volta da Semana Santa.

A Tropa traballando con alegría

Lobatos e Tropeiros rematamos o día moi cansos, pero moi satisfeitos polo bo ambiente e polo bo traballo realizado. Esperamos rematalos pronto para que os poidades visitar e nos digades que vos parecen.”